بما إن العنوان باللهجة العمية قصدي العاميّة يبقى تعالو نكمل بقيت الحكاية كدا قصدي المقالة خصوصاً إننا هنتكلم عن إخطبوط واحواض سمك وبغبغانات وتعابين , يعني كله يركز كويس ويستعد لدخول سوق الجمعة قصدي يستعد للقراية وبالعامّية لأنها من أصل تراثنا المصري ولازم نحافظ عليها . طبعاً كلنا شفنا كأس العالم , الحقيقة مش كلنا شفنا كأس العالم لأن نص الماتشات كانت مشفرة ومش كل الناس عندها اشتراكات , المهم إن الأكيد إن كلنا شفنا الأخطبوط العجيب على كل المواقع والفضائيات والبرامج . الإخطبوط اللي أظهر على الأقل ليا أنا شخصياً مدى جهل أوروبا وألمانيا بالتحديد رغم إنهم متفوقين علينا علمياً بحوالي 50 او 650 سنة تقريباً وبيصنعوا كل شيء واحنا مش قادرين نصنع حتى ولاعة بوتاجاز . لكن برغم التقدم العلمي الرهيب والفكري لأوروبا وألمانيا إلا إنهم صدقو إخطبوط محبوس في حوض سمك , ومشيو وراه واعتبروه إله الحظ زي ما بعض الصحف الأسبانية قالت وناس تانية اعتبروه بيعرف الغيب وكأننا في العصر الحجري . ولأن كأس العالم مكنش فيه كورة ومكنش فيه حد يستحق يكون نجم البطولة استغل الاخطبوط العجيب اللي اسمه بول الموضوع دا وبقى هو نجم البطولة وتفوق على كل اللي حاولو يعملو زيه واولهم طبعا البغبغان التايواني والأخت الفاضلة الست لاريسا ريكيلمي اللي حاولت تخطف الأضواء لكن عم الاخطبوط بول طلع مبيرحمش . دا حتى معملش حساب العيش والجمبري اللي بياكله في ألمانيا وكسب أسبانيا ماتش قبل النهائي على حسابهم , وطبعا جماهير ألمانيا انفجرت غيظ من الاخطبوط وطالبت بطرده خارج ألمانيا , زي ما طلبت جماهير هولندا بقتله وأكله مشوي بعد ما كسب أسبانيا النهائي على حسابهم ! واتحول كأس العالم فجأة لبطولة التوقعات واليانصيب والاخطبوط والبغبغان والشعوذة , وانا بنصح كل حد عنده اخطبوط انه يحافظ عليه كويس ويحاول يدربه على لعبة العلب إياها يمكن حظه يضرب ويتوقع ماتشات كاس اوروبا صح وساعتها هيبقى صاحبه ملياردير . لكن لو الاخطبوط المصري دا اتوقع ماتشات الدنيا كلها صح وماتشات الدوري المصري كلها صح مش هنلاقي حد يشتريه بجنيه في مصر لأننا بمنتهى البساطة عاقلين مش جهلة زي الشعوب الأوروبية اللي مشيت ورا حتة إخطبوط وعملته إله , ولأن مفيش مسلم أو مسيحي هيصدق حكاية ان الاخطبوط بيعرف الغيب دي .. اللي ممكن يصدق هو بس الجاهل زي الناس الأوروبيين بتوع الاخطبوط الألماني كدا . وفي النهاية أتمنى إن الاخطبوط ميزعلش مني لإني ناوي أجيب واحد زيه بس صغير شوية وارميه في حوض السمك جمب اخواته , عشان كل ما اشوفه افتكر جهل قارة بيقولو إنهم العالم الأول وبيقولو علينا متخلفين , وبوجه الشكر للإخطبوط لأنه أظهر الناس دي على حقيقتهم وبان الفرق بيننا وبينهم واتضح مين الجاهل ومين اللي عنده مبدأ وعقيدة وعقل سليم .